Résumé
L'ensenhament bilingüe francés-occitan dins l'escòla publica comença tre la mairala e demanda la mesa en plaça d'un dispositiu particular per faire alternar las lengas, que son utilizadas coma esplech de comunicacion dins l'ensenhament de las disciplinas non lingüisticas. Aital, d'apòrts lengatgièrs, culturals, cognitius e disciplinaris son observats en cò dels escolans. Mas l'ensenhament de la literatura en doas lengas pausa problèma als regents de las classas bilingüas que lo menan sovent sonque en francés. La tòca es de mostrar los beneficis e los limits dels aprendissatges dels escolans de cicle III en classa bilingüa quora fan, o fan pas, de literatura dins las doas lengas. Es mes en evidéncia que los apòrts del bilingüisme son mai eficaçes en cò dels escolans que fan de literatura en francés e en occitan qu'en cò de los que ne fan pas qu'en francés. E mai encara, lors rapòrts amb la lectura, amb las òbras literàrias, amb las lengas e amb las culturas josjacentas son diferents. De mai, a partir de las demarchas constructivistas coma la pedagogia de projècte, la mesa en plaça de malhums de literatura de joinessa e de dispositius d'interrogacion de tèxtes modèrns, l'ensenhament bilingüe pren tot son sens e los apòrts son maximizats. Lo desvolopament de l'ensenhament dels contes, genre literari particularament adaptat als enfants e que la plaça es legitima veire indispensabla a l'escòla, permet de metre en evidéncia un biais d'ensenhar dins las classas bilingüas de cicle III, centrat sus l'oral, propiç als aprendissatges disciplinaris, mas tanben metodologics e dins lo mestritge de las lengas e de la comunicacion lengatgièra.